馬會推130蚊自助餐慶生辰

【明報專訊】馬會為慶祝130周年活動多籮籮，包括巡迴展覽、各項社區活動及國際級馬術匯演「Cavalia」；喺下月10日及明年2月1日舉行嘅兩個賽馬日，馬場餐廳更加會「賣大包」，推出130蚊自助餐及套餐，仲有各種傳統地道小食，市民今次有口福喇。


可電1817訂座

明年1月10日及2月1日兩個賽馬日，沙田及跑馬地馬場會推出130蚊自助餐同套餐，畀會員同公眾以優惠價130元，享用馬場內餐廳各款美食，顧客仲可以同時品嘗到特別為周年誌慶精選嘅馬會四大會所美食，市民即日起可致電馬會熱線1817訂座。就算唔入馬場餐廳，馬迷都可以食到好嘢，沙田馬場嘅場畔飲食櫃位提供13款、每款以13元優惠價發售嘅地道懷舊美食，包括白糖糕拼芝麻卷、碗仔翅同滷水串等。


國際級馬術匯演助興

而明年3月尾，國際知名馬術匯演「Cavalia」會來港表演，由50匹良駒聯同42名表演者，喺大型帳幕內進行集雜技、舞蹈、空中特技、現場音樂演奏及馬術於一身嘅多媒體表演，喜歡馬術表演嘅朋友不容錯過。


馬會行政總裁應家柏話，馬會130年來同香港並肩走過高低起跌，適逢誌慶推出多項活動，希望與廣大市民分享喜悅。佢仲大曬數字，話過去5年馬會慈善捐款數字令人鼓舞，由15億元升至36億元，升幅逾倍，馬會每年交稅就接近200億。連埋請人等等，馬會舊年已為香港經濟貢獻320億，佔香港GDP嘅1.5％。