大神挑機小米 搶屌絲市場

【明報專訊】小米家幾乎成為行內公敵，除咗格力董明珠之前炮轟小米喺「小偷集團」之外，奇虎360同酷派（2369）剛宣布聯手成立合營公司大力發展「大神手機」，仲話要做到性價比第一，擺明車馬搶小米生意。酷派財務總監蔣超噚日向記者會上回應小米因為涉及專利喺印度被禁售一事，就話自己公司有成超過5000項專利，衝出海外市場絕對唔會有問題，擺明寸小米。


查實奇虎360老細周鴻禕成日同小米「教主」雷軍口水戰，奇虎同酷派合作亦似是針對小米現有市場，大神手機而家定價700蚊至800蚊港紙，分明追住小米嚟打。喺內地用小米被視為「屌絲」（內地網民自嘲貧窮嘅用語）象徵，蔣超就話大神手機要搶攻「屌絲中的精英」市場，估計大神今個財年嘅出貨量目標1500萬部，出年1500萬至2000萬部，希望5年達5000萬至1億部。


小米手機被愛立信指侵犯專利，喺印度市場一度被禁售，連華為都忍唔住有走出嚟抽水，華為董事長余承東噚日喺北京發布其新旗艦機榮耀6 Plus，同樣講咗句「同業不交專利費很不公平」。


[小琴密語]