立會火警演習 議員助理被困

【明報專訊】立法會噚日有火警演習，現場消防員總結演習時話，消防鐘響後4分30秒見到首批人喺添馬公園集合，不過秘書處話最後用咗14分鐘先疏散450人。原來有議員助理一度被困樓層未能疏散，有議員助理同Emily講，隔住玻璃望住其他層嘅職員走晒，自己都走唔到，當時心情非常絕望咁話。


不論建制派定係泛民嘅議助亦未能拍卡開門通往緊急通道，最後要勞動議員幫手拍卡先可以「逃生」，有助理就懷疑同立法會前排收緊探訪規定有關。


秘書處早前限制議員助理只可以去1樓、5樓同其辦公室樓層，搞到議助平時去其他樓層開會都要靠人開門，已經引起部分議員助理不滿，今次再發生「死過翻生」事件，Emily聽聞部分議助打算同秘書處見面要求改善。