黃之鋒被趕落的士

【明報專訊】學民思潮召集人黃之鋒作為佔領運動核心人物之一，得罪咗唔少司機，佢噚日喺商台《在晴朗的一天出發》節目中話，有一次上咗部的士話要去金鐘，估計司機開頭未發現佢係黃之鋒，但駛咗半個路口後就突然話﹕「你落車啦！」黃之鋒亦好順攤話﹕「好呀！」佢話都費事問司機原因，「知你係黃之鋒，盞鬧多兩句」。


之鋒話，都遇過其他反佔中司機，初時見有人截的士會駛埋佢度，但發現佢係黃之鋒後，就即刻高速駛走，唔畀佢上車。


學聯秘書長周永康噚日搭的士去商台接受訪問，都遇到司機邊聽電台報道清場新聞，邊自言自語批評「佔咗咁耐，你哋佔成世啦」，估計佢未發現自己載住嘅係周永康。