建制派為赴財爺飯局

【明報專訊】佔領行動期間，立法會將大會休會時間由原本嘅夜晚10點提早至8點，不過金鐘清咗場，照計開會亦應該正常番。不過，民建聯主席譚耀宗噚日喺內委會提出，40幾個建制派議員喺下星期三晚上有活動，希望可以繼續喺夜晚8點完會。一班建制派議員就神神秘秘咁，無講明究竟有咩特別活動要去咁重要。


盧偉國：無諗過金鐘咁快清完場

經民聯盧偉國話，無諗過金鐘咁快清完場，所以先安排周三晚活動。其實所謂活動，原來係當晚財政司長曾俊華會請佢哋食飯，打算交流吓預算案等民議題。呢排議員8點就收得工，似乎都好習慣，新民黨葉劉淑儀仲借勢建議，不如以後將休會時間改到8點，話議會都要實行「標準工時」，話8點收工都「好正常」。


要曾鈺成下周決定

不過公民黨毛孟靜話，泛民曾經要求喺六四晚上提早休會，等佢哋可以去六四晚會，但建制派唔肯，人民力量陳志全更加講明，唔能夠因為議員私人活動而提早休會，否則佢會每15分鐘點一次人數。究竟佢哋可唔可以咁順利8點就鬆人去食飯，就要睇立法會主席曾鈺成下星期點決定喇。