特首的新常態

【明報專訊】一年一度的中央經濟工作會議在北京召開，習大大為2015年經濟發展勾勒出框架，樹立發展信心，堅定改革決心，引領中國經濟發展「新常態」；習大大極力推崇呢三個字，英文係New Normal，原本係美國經濟學家提出，形容2008年金融海嘯後全球經濟進入「大調整期」，經濟劇烈變化，投資風險大增。中國就要把握呢個新常態，創新宏調，深化改革。最近筆者有一個夢，希望梁特都可以創造他的新常態，幫幫香港。


要有新常態，其實好簡單，就係請梁特一反常態，信任公務員、政治問題政治解決、不再激化矛盾、聽取民意，最理想係放下權力慾，專心返屋企重建家庭和諧，食晒啲「龍蝦伊麵」，不再打2017年的主意，咁樣香港先有機會再創新天地，免於淪陷為怪獸都市。


王岐山倘上位 陳德霖有力問鼎特首

點解筆者會有呢個夢，係因為中央經濟工作會議前夕，竟然傳出克強總理或因病辭職，然後就有人估計什麼汪洋、孫政才、韓正等有機接替，不過三人家連常委都唔係，如果要打賭，小弟會買打老虎打到澎澎聲的岐山副總理囉！跟住筆者就諗喇，香港邊隻黑馬同岐山最熟呢？梗係金管局陳德霖啦﹗佢同岐山在推動香港人民幣業務上一唱一和，仲被讚過成功應對金融海嘯，真係唔簡單㗎！

政界對於陳德霖，都話佢有能力，但就帶着三分高傲囉，而可能成為絆腳石的就係「肥龍契仔」呢個身分喇。范太話，如果2017年有梁振英、葉劉同梁錦松落場，都叫做有選擇㗎喇，政治老手講嘢邊可以信㗎，插咗你一刀都未知，不過聽佢咁講，筆者就更加看好陳德霖。如果岐山副總理升正，在十九大發光發熱，陳德霖就可以入直路，梁特的新常態就有機會實現。


中央經濟會議前 罕有全無官方消息

不過，克強總理身體狀况屬國家機密，筆者點會打探到，但內地朋友就提點，即管睇實中央經濟工作會議，克強有冇現身。奇怪的是，會議12月9日正式召開，小弟還未搵到一則官方新聞，詳列參會領導情况，舊年係咁寫的：「中央經濟工作會議12月10日至13日在北京舉行。中共中央總書記、國家主席、中央軍委主席習近平，中共中央政治局常委李克強、張德江、俞正聲、劉雲山、王岐山、張高麗出席會議。」跟住去人民政府官方網站，關於總理的頭條新聞，竟然係佢收到人民送給他的「撥浪鼓」，話會正式被國家博物館收藏，唔知係咪因為有人「無風起浪」，所以就拎個「撥浪鼓」出來以正視聽呢。


P.S. 清場在即，希望過程不要太悲壯，回顧整個佔中運動，最莫名其妙的是每次風平浪靜時，總有人故意挑機，煽動民情，願所有人士冷靜。


[應正亮 廿四味]