黃定光話鳩嗚似「蛇蟲鼠蟻」

【明報專訊】金鐘佔領區清場前夕，41名建制派議員舉行聯合記者會支持警方全面清場。以往呢類場合，建制派議員都「自說自話」、亮點唔多，但佢哋噚日就好有創意，例如經民聯林健鋒就叫人分清楚「邊個係人、邊個係鬼」，批評有啲人到今日仍然叫人衝擊，係「麻木不仁，立心不良」。工聯會王國興就希望警方清除金鐘佔領區後，盡快清埋銅鑼灣，以免「留下癌種」。


不過，講到最爆嘅都係民建聯黃定光，佢話旺角清場後，每晚都上演所謂「鳩嗚」鬧劇，造成好大滋擾，形容呢啲示威者路過商戶，好似「蛇蟲鼠蟻」行過，令居民及商戶討厭。


林健鋒點名批評佔中發起人之一戴耀廷呼籲響應不合作運動，如不交稅等，係知法犯法。佢黨友、經民聯主席梁君彥亦話，學生有理想有堅持係好事，但唔應該被激進派利用，佢話佔領運動家嘅支持度已經好低，形容如果再引起流血事件，會係「血腥嘅鬧劇」，對香港無益。


體育、演藝、文化及出版界議員馬逢國就有個好有趣嘅呼籲，話知道唔少文化界人士都愛惜佔領區內嘅藝術品，呼籲如果認為佢哋覺得佔領區內嘅作品有保留價值，就將佢哋盡快清離佔領區，以免被清走。