理大阿sir用獅子山直幡出卷

【明報專訊】獅子山上嘅「我要真普選」直幡不斷被複製，理工大學應用數學系副教授李向榮就將佢擺喺試卷度，要修讀應用數學、應用物理等科目嘅理大生，計算用飛行相機拍攝直幡嘅最佳位置同角度。不過，呢條試題下面就注明，係由李向榮出題，唔代表應用數學系立場。


李向榮同Emily講，係佢主動加呢句「免責聲明」入去嘅，因為題目要經過好多教師審批，未必人人都想將政治放入試題，佢要「一人做事一人當」。佢喺facebook話，份試卷會放入大學圖書館資料庫，唔介意其他人教數學時採用，愈多人知道有嗰塊直幡愈好。佢又同Emily講，有啲考生好認真答題之餘，不忘喺試卷上表達真普選訴求。


今日金鐘清場，表明支持雨傘運動嘅李向榮話，今日下午開完教務會會議後，就會趕去佔領區周邊，確保佢認識嘅佔領學生安全，有乜嘢事就即刻支援；到時佔領區應該已被警方封鎖，佢唔會硬闖入去嘅。