民主黨演「選戰」 卿姐遇3男挑機

【明報專訊】民主黨將於周日選出新一屆中委領導層，噚日截止報名。今屆選情相當激烈，單係主席就夠腳開枱，有4個人角逐，爭取連任嘅劉慧卿要單挑三男，包括事先張揚表明絕非「陪跑」嘅南區區議員「乳鴿」區諾軒、近排參加佔中自首後人氣急升嘅立法會議員胡志偉，現任司庫吳永輝更同時報名選正、副主席職位。


胡志偉吳永輝歐諾軒參選

卿姐噚日就同Emily講，3個主席候選人「個個都係佢對手」，仲話有劇烈競爭先會有進步。卿姐講，今年中委選舉熱鬧過其他地方選總統，留到最後一刻先報名參選嘅佢，原來一早準備好圖文並茂嘅彩色宣傳單張，話雖然支持民主黨要由年輕人帶領，但仍「接納」一啲黨友建議競逐連任。


Emily聽聞，胡志偉噚日先正式決定去馬，胡志偉同Emily講其實都諗咗幾日，希望參選可以畀黨友有「多一個選擇」。至於副主席一職亦出現3人爭兩個位嘅情况，候選人包括現任副主席羅健熙，以及葵青區議員尹兆堅，同埋吳永輝。


民主黨噚日共有42份提名競逐27席中委，當中吳永輝就率領10人團隊參選中委，希望推動多元，今日仲會開記者會介紹團隊。