【明報專訊】呢輪王師奶好矛盾，一陣話「通識宜殺不宜閹」，勸吳局長Man up，引刀成一快，殺掉通識科；一陣又話梁美芬和劉炳章扮專家，亂噏廾四；一陣又話葉劉淑儀提議將通識變選修科是遺半禍於人間；一陣又讚中學校長會主席李雪英喝停刪改通識課程是天降清流。現在又叫人冷靜看通識課程諮詢，讀者未鬧小婦人，小婦人自己都鬧自己。
寧專注語文培訓
經過一輪思考，小婦人覺得自己思想統一，立場絲毫未改，只是旁邊的噪音令思考過程有些漣漪而已。王師奶取消通識立場不改，因為實在太「勞『神』傷『才』」了。與其浪費太多學習的寶貴時光去搞揠苗助長的所謂通識，不如聚焦於語文培訓。只要語文掂，汲取知識何止事半功倍，簡直聞一知十，而且興趣盎然，有興趣就有動機，何愁通識不通！有些議員高官，見到班學生從金鐘瞓到旺角，就話禍由通識，講這些話的人真是超白癡，我哋唔食唔著，慳埋D孤寒錢去納稅養這班腦袋生草的人，除了嘔血，夫復何言！
教局修正課程算妥協
牢騷發完，言歸正傳。就算王師奶、王永平和陶傑嘈到拆天，吳克儉都唔會Man up到殺通識，退一步將通識課程修正，也算是妥協的一步。將為禍學生哥的範圍收窄，也算是壞事中的好事，把1000粒細菌減為500粒，死人都會死得慢啲啦。教育局強調檢討課程早於去年9月開始，委員會由教師及大專學者組成，呼籲各界不應強行扣上政治帽子，回歸專業軌道，教育局強調將舉辦多場簡介會向學校闡釋建議並收集意見。王師奶好少撐教育局，因為他們好事做得少，蠢事做得多。
王師奶好同情教育局的官員，雖然話他們做好事少蠢事多，其實責任不在他們。他們只是公務員，打份工，無權話事，遇啱個霸道倀雞的波士，除了Yes、Yes之外又可以點呢？唔通同佢拗到面紅面綠乎！遇啱個乜都唔識，但又A字膊的一哥更死，攞彩的時候你企兩邊，有難的時候你一定死先。
讓專業歸專業
細數回歸十七年，教育頭頭有霸道的，有笑騎騎的，有傻更更的，教育局官員睇到眼都定埋。各位看官，何不放下偏見，不以陰謀眼光看這次課程諮詢，讓委員會以專業角度修改課程。委員會的委員們不是傻的，在整個社會牛咁眼吼住，點會打橫來吖。衰就衰在一些無腦的議員和高官，把學生哥對社會的關心歸咎於通識科，而課程的檢討又適逢於此時此刻進行。王師奶雖然人微言輕，但呼籲讓專業歸專業，給教育局一點時間。
再重申一次，王師奶仍堅決贊成在中學取消通識科。
作者簡介﹕不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟
文﹕王師奶
新聞類別
副刊
詳情#
留言 (0)
