撐警遊行錯寫「熟」不可忍

【明報專訊】噚日有兩個團體遊行以示撐警，Emily有到場採訪，其中一個名為「和平論壇」嘅組織，雖然只有約20人參與遊行，但都準備咗大批大紅橫額及標語，仲寫有特首梁振英早前評論佔中嘅「是可忍」言論，但Emily睇到橫額覺得有啲怪……哦，原來佢哋將「是可忍 孰不可忍」寫成「是可忍 『熟』不可忍」。有人拍低咗隊伍遊行時持錯字橫額經過魚蛋粉店，難怪有網友留言笑謂係咪啲魚蛋煮唔熟呀。


Emily見到「和平論壇」負責人趙先生，佢話佢哋唔止係撐警，亦要求撐佔中嘅人要學習國民教育，話香港教育已死。當Emily提醒佢橫額有錯字，佢仲反問﹕「唔係生熟個熟咩？」不過佢好快就用堅定嘅眼神同語氣咁講﹕「唔緊要，我哋唔好小題大做，做人要大是大非！」各人繼續撐住寫有「是可忍 熟不可忍 支持警察 嚴厲執法」橫額示威。