復星老闆教員工「耍太極 」

【明報專訊】過去皇帝都想成仙成道、長生不老。宜家富豪都一樣，最興嘅都係太極拳、辟穀、童子功呢啲養身功夫，好似阿里巴巴創辦人馬雲每個月會齋戒一次，佢老友復星（0656）老闆郭廣昌就鍾意太極，仲好積極喺公司推廣"口添"。
話說郭廣昌原來會請師傅到公司為員工教太極班，仲要特登留一層辦公室做太極館，畀人隨時入去打套太極鬆一鬆骨。佢同成班員工講，太極唔單可以強身健體，更係可以將思維提升，對做人做事幫助好大。小琴心想，如果太極打得好，喺復星升職加薪話唔定都會快啲。
華為公司有牀瞓
話時話，內地啲老細都幾惜啲員工，以復星為例，朝早九點半開工，夜晚五點半收工，幾乎無人OT，中午由十一點半到兩點仲係自由時間，食飯，瞓覺都得。而深圳華為更加為員工準備牀褥，畀員工午休。呢一點，我哋香港真係要學吓啦。
[小琴密語 email: piano@mingpao.com]