六叔伙日導拍《楊貴妃》 電影資料館可重溫

【明報專訊】鍾意研究香港電影嘅朋友，下個禮拜不愁無節目。為咗回顧同紀念一代影視大亨「六叔」邵逸夫嘅成就，香港電影資料館推出全新節目「邵逸夫傳奇夢工場」，本月12號至明年2月7號期間，精選30多部1950至70年代嘅邵氏電影播放，包括古裝片、青春偶像片、武俠動作片等。


節目會聚焦邵逸夫喺香港事業開拓期所監製嘅電影，包括佢伙拍日本導演溝口健二，喺1955年首部監製嘅《楊貴妃》，呢套電影更開拓咗港日合作領域。另外多套經典好似《江山美人》、《桃花扇》、《倩女幽魂》、《儂本多情》等亦會相繼播放。電影票價40元，設長者、學生、殘疾人士半價優惠。


為咗配合電影放映，資料館其間會舉辦3場座談會，邀請多個專家、影評人同資深影迷與觀眾分享六叔嘅電影創作同營商取向。詳情可瀏覽http://www.lcsd.gov.hk/fp/zh_TW/web/fpo/programmes/2014shaw/index.html。