【明報專訊】青年問題？香港問題！
每晚開車經過中環海皮，看見那個着了燈的摩天輪，襯托對岸華燈初上，香港真係好靚……只可惜，現在再看見這個摩天輪，就會想起梁特打算用佢做維穩工具，這個connotation，幾乎完全將它的浪漫氣氛消滅殆盡，摩天輪呀摩天輪，只能怨你生不逢時喇……
後佔中的香港，一班早已上岸嘅老餅開始陸續公開講嘢，話佔中反映嘅係深層次嘅青年問題，年輕人因為無機會上位、無機會買樓、無機會向上流，所以先要瞓街佔中。坦白講，筆者唔敢話這種論調一定錯，但有一點可以肯定，就係呢類人提出的所謂解決辦法，唔使旨意可以止咳。
試想想，呢種一早已上位嘅阿叔，靠佢諗辦法協助青年人，第一句肯定係由「想當年，我乜乜物物」講起，然後就叫班後生唔好怕克苦蝕底、要了解祖國、把握「十二五」「十八大」同「四中全會」嘅機遇等等等等。大佬，後生仔未聽完你講都已經走人，仲諗住佢會講「多謝」，傻的嗎？
以供樓應付青年「講唔過去」
又有一種想法，認為畀層樓班後生，佢就會因為要掛住供樓，唔會搞事。筆者最近有機會參加一啲政府搞嘅諮詢會，會上真係唔少人叫梁班子起多啲「青年公寓」畀班後生，即使減少起公屋、居屋都無問題咁話。筆者聽到「青年公寓」呢四個字真係覺得好鬼哽耳，一來「公寓」呢兩個字實在令我有啲不太健康嘅聯想，二來你為咗班年輕力壯、四肢健全嘅後生可以嘈少啲，而去犧牲另一班一家四口只能住一個80呎劏房，冲涼要去公廁解決嘅小家庭，係咪有啲講唔過去？今時今日香港真係靠惡就大晒？
推班後生做「樓奴」，的確可以令佢哋周身唔得閒，無時間上街。筆者身邊就有後生朋友要為供樓日打兩份工，無晒生活興趣。眼下香港樓市，加息在即仍然只升不跌，現在叫後生仔上車，隨時變做負資產計時炸彈。
即使梁特再講他如何有決心為大家處理樓市問題，看他過去兩年半的成績，相信不少人如筆者對他已不抱任何希望。像那個令二手市場炒得更刺熱的「白居二」計劃，如今由5000名額減半至2500，筆者聽聞，班梁粉同高官考慮過將計劃取消，但又擔心等如承認當日錯誤，今天的我打倒昨日的我，最後才會決定減半。
沒退路 被迫競爭成輸家
長居美國的朋友說，在紐約長大的年輕人，發現自己無法適應激烈競爭，可以搬到New Jersey，甚至是更內陸一點、生活指數低一點、競爭少一點的城市，無論如何總會找到一個適合自己的地方。這種多元的生活選擇，在其他國家的確是可行的，但在香港就不行，因為無人願意放棄香港返到內地生活，那是一國兩制成功落實的真實寫照，但同時，所有年輕人就只能困在總面積只有1104平方公里的小城裏面，別無選擇參與永無止境的無情競爭，而大家都知道，在任何競爭中，贏家必屬少數，輸家總佔多數，而由輸變贏就永遠是異數，在這背景之下，成年人苦口婆心叫年輕人要提升自己迎接競爭，年輕人聽在耳裏怎會不刺耳？
社會結構問題 非摩天輪能解決
所謂的青年問題，深入一點看是香港整體社會和經濟的結構問題，絕不可能是免費坐坐摩天輪，搞個青年舞會或辦一兩次青年政策高峰會就可以解決，這些所謂辦法，說穿了都是政棍整色整水的門面功夫。環境所迫，交差而已。
忠實梁粉羅范淑芬說，她有朋友因為怕了年輕人而打算移民。筆者想說，她的朋友是幸運的，因為他/她有能力移民，可憐那些每日生活在絕無輪迴，不見出路的年輕一代，他們看着這班手執權力的阿哥阿姐亂噏廿四，連移民的能力也沒有!
嗚呼!
[應正亮 廿四味]
新聞類別
副刊
詳情#
留言 (0)
