劉遵義獲榮譽博士 中大學生會反對

【明報專訊】中文大學將喺星期四向7名社會知名人士頒授榮譽博士學位，包括中大前校長劉遵義，讚揚劉為大學作出多項貢獻，包括制訂10年策略發展計劃，提升教研質素。不過，中大學生會噚日發表聲明堅決反對，批評劉沒盡校長本分，指佢漠視民主精神、向專制政府獻媚，所以無資格獲咁高嘅榮銜。


中大學生會話，劉遵義當年上任校長後，馬上將遴選學院院長，由推選制改為委任制，又喺任內向前特首董建華頒發榮譽博士學位，批評「表揚專制政權嘅領導人絕非有道德操守嘅校長所為」，有損校譽。學生會會長張秀賢仲話，劉最過分係2009年，喺無諮詢嘅情况下，以「政治中立」為由拒絕喺校園擺放民主女神像嘅申請。


另外6名獲頒榮譽博士學位者分別係諾貝爾文學獎得主莫言、知名音樂家顧嘉煇、哈佛大學榮休教授Robert C. Merton、中國建築師王澍、機械工程專家周濟，以及南豐集團主席陳慧慧。