華仔金曲改編 《日日去鳩嗚》瘋傳

【明報專訊】旺角佔領區被清場後，市民化整為零，自稱響應特首梁振英呼籲到旺角「鳩嗚」購物。有「高登仔」苦中作樂，改咗一系列嘅歌詞，其中劉德華首金曲《獨自去偷歡》就被改做《日日去鳩嗚》，仲配埋華仔個MV，搵埋一個同華仔把聲好似嘅網民翻唱，質素好高㗎，歌詞琅琅上口—「日日去鳩嗚 我 謝絕你監管 落旺角使錢 我 是但buy隻碗 」。


梁栢堅改《飛女正傳》諷警

不過，Emily覺得最抵死係呢句「遇着李私煙 我 未食嘔兩碗」。改歌成風，連填詞人梁栢堅都玩埋一份，將楊千嬅首《飛女正傳》改做《黑警正傳》；亦有網民將陳奕迅首《Lonely Christmas》改做《鳩嗚聖誕 Shopping Christmas》、Beyond首《光輝歲月》改做《鳩嗚歲月》，好多歌詞都好抵死，Emily覺得香港人真係創意無限。