民間Yellow culture 延伸佔區文化

【明報專訊】佔領行動持續兩個月，有市民自發成立「yellow culture」活動，希望喺每個月28日舉行社區活動，包括向無家者派發物資，同埋喺小店購物，延伸佔領區文化。佔中發起人陳健民亦喺fb向大家推薦。不過，yellow culture負責人話，行動係民間自發，同團體政黨無關，落區時亦非以宣揚佔領為主。9月28日警方向金鐘示威者施放催淚彈，引發大批市民佔領金鐘、旺角同銅鑼灣。「28日」作為佔領一個標誌性日子，yellow culture希望每月28日都可以舉行社區活動，關懷街坊。


民記押後訪太子齋舖

另外，民建聯議員本來約咗今朝11點去太子一間齋舖探訪，為商戶打氣，了解佔領行動影響，昨早仲發咗採訪通知，但下晝葉國謙就話探訪「改咗期」。被問到係咪擔心安全問題，阿謙話活動係地區安排，但因應最近情况，決定可以後少少時間先去，強調唔係「取消」。