被指「罰企」 百老匯：街頭鼓勵同事

【明報專訊】網上流傳一張旺角百老匯電器售貨員喺店外街頭「排排企」相片，被指係職員跑唔夠數遭「罰企」。百老匯噚日回覆查詢時承認，分店主管曾喺店外街頭「鼓勵及教導」前線同事，對事件令公眾誤會，要向各位致歉。


為帶來誤會致歉

百老匯發言人回覆Emily，旺角分店職員日前排排企喺西洋菜街事件，經過內部了解，網上拍攝嘅片段，係當日該公司分店主管帶領同事開簡報會。發言人話呢類簡報會係零售業常用方法，仲話近呢兩個月公司生意大跌，尤以旺角區為甚，所以分店開簡報會就更加頻密。發言人話上周事發當日，旺角分店因部分產品未達銷售目標，所以產品主管透過「分享、鼓勵及教導前線同事」，要求各同事共同努力，令當日營業額能達標。


發言人話「事實與網上流傳不符」，但承認分店主管「錯誤在店外進行簡報會」，令公眾誤會，「現謹代表公司向各位致歉」。