售貨員話「跑唔夠數」被罰企

【明報專訊】電器舖職員喺旺角西洋菜街一字排開，原來唔係做聖誕推廣，而係齊齊「罰企」？話說網上流傳一張電器舖職員喺鬧市街頭「排排企」嘅相，上載嘅網民話行過西洋菜街，見到一排售貨員戙晒喺度，其中一個自稱sales嘅人仲向網民講話因為跑唔夠數，所以畀經理罰企。


從該張網絡圖片可見，員工著住嘅藍綠色制服同電器店百老匯嘅制服幾乎一樣，相中位置所見，涉事嘅分店疑為旺角銀行中心分店。Emily噚日走訪百老匯旺角銀行中心分店，獲店員確認「罰企」事件；其中一名店員承認有店員被罰企，另一個就靜靜雞同Emily講話一共有十幾人被罰企，成個過程歷時10分鐘，又確認網上「跑唔夠數」被罰嘅講法。


百老匯：要先了解事件

拍攝照片嘅網民喺網上討論區一個主題「百X匯sale的悲哀」嘅post入面，引述其中一個被罰企嘅sales話「開唔到附加推銷而畀老經（經理）罰」。本報欲向百老匯了解事件，百老匯話要先了解事件，至截稿前未有回覆。