100毛林日曦指年輕人唔要滬港通

【明報專訊】佔中以來大熱的刊物係乜？相信非《100毛》莫屬，呢本書仔每期都好到肉咁拮中社會事態死穴，都幾幽默，Emily同唔少朋友都有追。商台《在晴朗的一天出發》噚朝就請咗《100毛》創辦人林日曦出席節目，佢話成年人成日講中國機會好多，其實年輕人好反感，覺得最好少啲，甚至無滬港通仲好。


「愈了解祖國愈疏離」

林日曦講起，新一代年輕人，你愈教佢哋通識，愈了解祖國，佢哋愈疏離，而成年人「開口埋口叫大家返大陸發展，開口埋口國家強大，有好多優勢畀到大家，滬港通乜乜乜，冇人care！」佢話，要政府了解年輕人真係「好遙遠」，講起佔中，佢認為年輕人唔係話要老年人下台，而係希望有自己發聲空間，所以應從政改入手，等年輕人能成為架構一部分，畀「萬四蚊樓下」嘅人能進到議會，咁就了解到年輕人需要。


節目中都有「成年人」代表嘅行會成員林健鋒回應，叫年輕人退一步海闊天空 ，若人人都堅持自己嘅看法，「冇得傾」，佢話年輕人唔好認命，但係要接受現實咁話。