同愛哥基犬 港人獲英女王回信

【明報專訊】今時今日少咗人寫信寄信，而寫信畀英女王你又試過未呢？最近有一個愛狗嘅香港人，知道英女王同佢一樣都好鍾意哥基犬，於是就寫信畀佢，結果收到英女王辦公室回信，話英女王都好開心知道大家一樣鍾意狗。


寫信畀英女王嘅叫Carol，佢男朋友早幾日喺facebook貼出英女王辦公室嘅回信，信係用白金漢宮信紙，由英女王私人助理回覆，雖然佢無貼出Carol信件內容，但從對方回信可知一二。女王助理回覆話英女王好開心聽到Carol都鍾意哥基，又話英女王對Carol欣賞佢喺2012年倫敦奧運開幕短片感到高興。


送英女王相片 拒親筆簽名

不過，Carol想要英女王親筆簽名就被拒絕咗，原因係英女王每日都收到好多人要求攞簽名，英女王只能簽畀佢真係認識嘅人，但就附上英女王相片畀Carol，希望對方鍾意。


有網民見到封信就話諗起《奇洛李維斯回信》呢首歌，但其實想要英女王回信唔係咁難，根據英國王室網站，英女王每日都至少收到200至300封公眾寫畀佢嘅信，佢會親自睇部分信件，然後同職員講想點回覆。