警被指一鋪清袋 許sir英文答明哥

【明報專訊】許sir又來了，不過無露面。「文化監暴」召集人、人稱「明哥」嘅歌手黃耀明上星期五喺《南華早報》撰文，題為Police must work to restore public trust after tear gas attacks（施放催淚彈後警方須努力恢復大眾信心），批評警方9月28日向行使公民權利嘅學生施放催淚彈，理應受譴責（deplorable），又話一向被認為亞洲最優秀嘅香港警隊，喺9．28後「一鋪清袋」。


報章撰文 指黃誤解

明哥又提到七警喺暗角打人案件令社會進一步分化，希望警方調查時能夠獨立同徹底，並要公開調查結果，仲希望警方公開武力使用指引。就住指控，呢排唔使主持記者會（4點鐘許sir）嘅警察公共關係科總警司許鎮德，噚日就用洋名Steve，將警方立場recap in English，寫咗篇Police had no alternative but to use tear gas on protesters（警方別無選擇 只能向示威者用催淚煙），批評明哥誤解警方工作。


許sir重申，警方使用武力有嚴格指引，又話當日示威者不停衝擊警方防線，警方別無選擇下使用催淚煙製造安全距離，又話警黑合作係無理指控，至於「暗角打人」案，警方正嚴肅調查。