曾鈺成再斥黨友 鑑林要收番言論

【明報專訊】噚日立法會質詢環節，又上演立法會主席曾鈺成向民建聯黨友毫不留情訓話一幕。話說有泛民議員質疑監警會大部分成員都係「梁粉」，民建聯陳鑑林（圖）就反駁話係「擘大隻眼喺前面，講大話、歪曲事實」；曾主席聞言就要求佢收回言論，話喺質詢環節對其他議員作出批評係唔公平。陳鑑林初時扭扭擰擰唔肯就範，要到曾主席大叫一句「我命令你要收番剛才嘅評論」，佢先肯聽。


泛民質疑監警會成員多「梁粉」

噚日立法會提出政府採取乜嘢準則委任監警會成員嘅質詢，身兼監警會成員嘅梁繼昌同民主黨黃碧雲都分別質疑政見唔同嘅人有冇機會做監警會成員，以及目前大部分成員係由「梁粉」出任。


保安局長黎棟國回應話，委任監警會成員時會考慮相關人士嘅專業，亦會考慮唔同背景、唔同政見嘅成員，否認以親政府人士為主。