迪士尼今起加價一成

【明報專訊】眨下眼就聖誕節，香港兩大主題公園都有新舉動。迪士尼噚日宣布加價，1日標準門票新定價499蚊，小童門票新定價355蚊，兩者加幅約11%。2日標準門票同小童門票新價分別係680蚊同480蚊，加幅約16%。而「奇妙處處通」成人銀卡、金卡同白金卡新售價分別係988蚊、2188蚊同2888蚊，而65歲以上長者全部門票售價不變。所有價格調整今日生效。


加價同時，迪士尼都有優惠提供畀香港居民、「奇妙處處通」會員同旅遊業界。喺未來兩個月（即明年1月10日或以前），香港居民仍可沿用舊價購買1日門票、2日門票及「奇妙處處通」。


海洋公園動物燈飾賀聖誕

海洋公園方面，今年佢哋用咗幾百萬粒環保LED燈，喺室內環境「怡慶坊」砌咗一個聖誕燈飾版迷你海洋公園，裏面除咗有大家最熟悉嘅動物大使，例如大熊貓、企鵝、海豚、大嘴鳥嘅燈飾外，仲有好經典嘅海馬標誌同埋超閃嘅摩天輪燈飾，將會喺12月13號開幕。海洋公園今年仲有棵高達70呎嘅聖誕樹，用七彩糖果做裝飾，聖誕老人亦會喺公園唔同角落同遊客合照。