董智庫顧問可望不可即

【明報專訊】全國政協副主席、前特首董建華牽頭成立智庫「團結香港基金」，各方都關注呢個基金究竟搞邊科，包括係咪幫人鋪路選下屆特首等，噚日智庫正式成立，吸引大批傳媒追訪，不過安排就認真麻麻，活動玩足成個上午，但記者全場企喺度，前面嘉賓席就空櫈處處。


記者難主動接觸嘉賓

話說噚日基金喺會展一個會議室舉行成立典禮同論壇，但唔知大會係咪無事前計算活動會有幾多嘉賓出席，結果典禮開始咗，仍有至少30張空櫈，感覺唔係幾好。唔少記者都想採訪吓出席嘉賓或者基金會顧問，不過大會就無呢個安排喇，因為大會用嚴密保安、圍欄限制記者採訪範圍，基本上記者都唔能夠主動接觸嘉賓。


鄭家豪答兩句被拉走

而大會安排嘅受訪者，似乎記者亦未必好大興趣，但佢哋回應亦受公關控制，話說運動員鄭家豪接受訪問時，有英文傳媒想問佢點睇特首梁振英早前話體育界無經濟貢獻嘅言論，點知鄭家豪答咗兩句就被公關阻止，及後被拉走。


至於基金講香港前景嘅論壇，雖然嘉賓陣容鼎盛，好似經綸國際經濟研究院主席馮國經、前財政司長梁錦松、中大全球經濟及金融研究所研究教授廖柏偉等，不過環節就唔似「論壇」，皆因大部分講者照稿讀，其中廖柏偉所讀嘅，係節錄佢9月喺報章嘅文章，似乎hea咗少少喎。