民記選「年度漢字」插佔中

【明報專訊】立法會第一大黨民建聯第三次主辦「年度漢字」評選活動，話用嚟表達對2015年嘅期望，而佢哋今年揀嘅10個候選漢字，擺明針對佔領運動，例如提名「穩」字，就附註解釋，話呢個字係因為社會紛爭，市民期望政府穩守以民為先立場，唔可以隨便因為「少數人極端的反對及批評而軟化」。


除咗穩字，其他9個字包括﹕憂、法、讓、危、禮、愛、義、亂、望。民建聯點名話佔中令社會分化，叫港人要臨危不亂。至於選擇亂字，梗係因為話佔中造成社會混亂啦。


民記教大家中文字用意係好嘅，但有網民就挑機，話今次10個字，咁啱有「禮」有「義」，但點解唔順手揀埋「廉」同「恥」呢？

可投票有獎金獎品

撇除選字嘅政治篩選考慮，呢個漢字選舉，真係率先做到一人一票「普選」，民建聯11月中旬會公布互聯網及同實體投票安排，而得票最多嘅漢字，會成為2015年度漢字，而投票者有機會得到唔錯嘅獎金，初部計劃送出3份手機電子品，同埋15份超市禮券。家未有普選，睇住獎品分上，大家不妨「袋住先」。