首帥首富齊齊推「雙十一」

【明報專訊】「當『首帥』遇上『首富』」？呢個唔係電視劇名，而係噚日喺內地微博及微信瘋傳嘅一個畫面，事關「萬人迷」碧咸噚日空降杭州，畀人影到佢同阿里巴巴董事局合照，而且據講咸爺今次係親自助陣淘寶一年一度的「雙十一」活動。


碧咸代言威士忌品牌

咸爺呢幾日馬不停蹄，前日先喺首爾，噚日上晝就到埗杭州，喺馬雲帶領下參觀阿里巴巴總部，據講咸爺其實係因為代言了一個威士忌品牌，呢次行程就係為嗰個品牌喺內地「雙十一」的酒水推廣活動助陣。


有個講法仲話活動包括一個網上酒水拍賣活動，成功投到拍賣品嘅幸運兒，可以喺「雙十一」同咸爺合照。


有內地網友就開玩笑話，碧咸今次搭上馬雲，係「首帥」和「首富」的會面。話時話，咸爺吸金力咁強，馬雲早排又買咗恒大足球隊五成股權，會唔會考慮下咸爺幫手踢返幾場波？


[小琴密語]