「富臨」賣燒鵝 有錢佬未聽過

【明報專訊】以下絕對是真人真事。

那天一位姓「張」的老闆來電，問我：「富臨是阿一鮑魚，還是阿翁？」

我說：「阿一鮑魚，天下第一，大有錢佬邱天生開嗰間富臨，"口依"家由佢個仔邱威廉揸弗吖嘛。」

他說：「"口依"家富臨上市喎，仲請我去食飯推介"口添"。」

我忍不住踎低噴飯：「上市間富臨唔係呢間喎，係食火鍋同食燒鵝嗰間。」

他說：「乜有間咁嘅嘢咩？我從來未聽過。」

我說：「有廿幾間分店嘅富臨你都沒聽過，就只知道只有一間分店的富臨阿一鮑魚，你真是不知民間疾苦。揾日我要請你去富臨食燒鵝，體察民情先至得。」

看來真的有人搞錯兩間富臨，怪不得邱公子威廉一講起個名被人用了，咁火滾啦。

有錢佬投資飲食業 阿仔打骰

講開又講，近幾年，好多有錢佬，都投資飲食業，畀個仔去搞，成為了一種風氣，例如舖王波叔就買下了海都，畀佢位公子打骰啦。

我的評語是，搞飲食業，吃力不討好，而且很多瑣碎的管理，最好用來磨練後生仔。再講，開一間酒樓，蝕極有個譜，最多自己叫多些朋友去幫襯，食晒D餸啫。

這當然是低級版本，高級版是四叔李兆基，索性畀間酒店個仔李家誠打骰……講開又講，已經有好多年沒有見過李公子，記得上一次，他還未進美麗華（0071），我在另一間酒店的廁所碰到他，大家一起小便，聊了幾句，晃眼又成十年了！

[周顯 投資二三事]