立會差4秒流會

【明報專訊】噚日立法會大會，人民力量等議員一如以往繼續不斷要求點人數，務求令建制派成日都要行嚟行去，食飯都唔得安樂。唔知係咪議員太習慣響鐘召人開會，所以無論泛民定建制派，都會拖到響咗10分鐘以上，先慢慢行番落去會議廳，結果「險象環生」，噚日下晝試過一次差4秒就要宣告流會。呢次「救番」個會議嘅，就係工聯會鄧家彪。
事緣噚日立法會討論由公民黨毛孟靜提出，要求引用權力及特權法調查特首梁振英UGL收錢風波一事，喺接近5點、民建聯陳鑑林發言期間泛民再要求點人數，結果大家都無咩感覺，雖然民建聯11個議員都乖乖地坐喺度，但仍然未夠35人呢個門檻，到只差唔夠幾十秒，仍然未夠人，當記者都預咗隨時流會時，鄧家彪就喺"車立"口出現，隨即喺一眾記者「打氣」下飛奔返會議廳，結果佢行到入去係14分56秒，成功避免流會。
噚日點人數，令會議進度變得幾慢吓，雖然每個議員只能發言15分鐘，但好似新民主同盟范國威咁，或者佢想多啲人聽佢發言，於是發言開始、中段時都要求點人數，每次等十數分鐘，令佢成個發言由15分鐘拖到變咗近1個鐘。