朗廷搵大學生排憂解難

【明報專訊】唔知大家記唔記得美國有個真人騷節目《飛黃騰達》，每集都會有唔同企業出題目考驗參賽者嘅營商能力。原來我哋香港都有類似嘅活動，就係由花旗贊助同舉辦嘅「國際案例分析比賽」，今年已經係第12屆。


呢個比賽會邀請世界各地大學嘅商學院學生來港參賽，學生們要幫指定企業排憂解難，今年出題嘅企業就係朗廷酒店，而優勝隊伍係來自美國賓夕法尼亞大學嘅學生。


對於呢個活動，朗廷酒店集團執行主席羅嘉瑞（圖）就話自己30幾歲先投身商界，所以好羨慕啲學生可以咁後生就認識到商業機構運作；而花旗為咗答謝朗廷酒店支持呢個比賽，就送咗支法國紅酒畀羅嘉瑞，最特別係紅酒嘅編號3370，正好代表羅嘉瑞1970年畢業，同埋佢33歲棄醫從商。


[小琴密語 email: piano@mingpao.com]