霆鋒入主漢傳媒 帶挈英皇齊齊發

【明報專訊】因為謝霆鋒入股而令股價倍升嘅漢傳媒（0491），噚日再升2.6%到0.77元價位，帳面計阿霆鋒佢已經短短幾日就賺成1.5億。不過原來除咗自己，霆鋒仲帶挈埋佢東家英皇賺咗超過兩億。


點解咁講？皆因有個財經博客渾水噚日寫咗篇文，解構番霆鋒入主漢傳媒嘅前文後理，原來響今年1月，漢傳媒曾經宣布供股，當時負責包銷嘅正正係霆鋒老闆楊受成旗下嘅英皇融資同英皇證券，因為當時供股唔足額，英皇最後用每股0.228元作價買咗3.8億股。


之但係由於依家謝霆鋒入股，谷起咗公司個股價，埋單計數，英皇手上呢堆股票即刻「牆紙變銀紙」，帳面賺成2億，真係唔怪之得當楊受成被問到點睇謝霆鋒單deal，佢會開心咁話好支持啦。


email: piano@mingpao.com

[小琴密語]