涂謹申左臂全日痛

【明報專訊】Emily噚日喺立法會撞到民主黨涂謹申，見佢黑口黑面，行路仲行到機械人咁，原來阿涂尾龍骨壓住條神經線，由左肩落到左手24小時全日痛，唔怪得無晒心情，阿涂話前後已經睇過4個醫生，包括著名骨醫、脊醫，針灸、拔罐都做埋，但仍然無起色，心情自然差。


原來阿涂喺佔領期間，曾經喺立法會辦公室扒喺張枱度瞓，佢思疑可能呢個係病因，但西醫未能確認。阿涂自爆近來要食藥先瞓到，好彩囝囝見到阿涂咁痛，識得拎啲工具畀佢拔罐，令到佢心都甜晒。Emily喺度祝阿涂早日康復！


（陳洛明攝）