葉劉論自由黨：黨員或轉投新民黨

【明報專訊】自由黨田北俊日前被搣咗全國政協委員身分，即刻辭埋黨魁職務，新民黨主席葉劉淑儀噚日喺電台節目講，新民黨同自由黨部分黨員同支持者嘅背景相似，「有可能啲（人）會轉投我哋」。嘩，咁快就搶人？葉太就補飛話﹕「有人認為田生係英雄、敢言，喺方面都有號召力。」田少就好有自信，回應葉太咁話﹕「相信好多新民黨嘅人都想加入自由黨！」


田少：多新民黨人想入自由黨

葉太噚日接受港台節目《千禧年代》訪問，被問到田少事件對新民黨喺邊方面有利，葉太就話兩個黨部分黨員同支持者嘅背景相似，例如唔少都留過學、係知識分子，或者係中上產人士，所以唔排除可能有人轉為支持新民黨。


葉太喺立法會就同Emily講，「唔方便講」有邊位自由黨員想轉會新民黨，只係重申唔少自由黨員或者中常委都係新民黨嘅朋友。


林大輝：唔做自由黨黨魁

另外，田少辭咗自由黨黨魁，Emily就問曾經被「招親」入黨嘅工業界林大輝，有無興趣去做自由黨黨魁，大輝笑笑口話﹕「做黨魁？呢件事一定唔會發生。」