林大輝訓CY 曾主席﹕你係咪政協？

【明報專訊】自由黨田北俊因為建議特首梁振英辭職言論而被撤銷政協一職，身兼全國政協委員嘅工業界立法會議員林大輝（圖）「無有怕」，繼續喺立法會訓斥梁振英，指佢近日嘅「體育界對經濟無貢獻論」令人摸不着頭腦、言論方寸大亂，質疑佢係咪因為佔中搞到無覺好瞓，所以講錯嘢。


提醒「要爭氣 唔好亂講嘢」

大輝仲提醒梁振英「你做人做事都要爭氣。唔好亂講嘢，否則香港同你都無乜前景，『你不殺伯仁，伯仁因你而死』」。主席曾鈺成見到大輝咁大膽，於是問大輝，「你係咪政協委員？」


噚日立法會繼續審議成立創新及科技局嘅決議案，曾經被田少「招親」入黨嘅大輝，唔知係咪有感而發，發言時提到家政界想講真心話，只要唔啱聽，仍然要付出代價。曾鈺成質疑大輝嘅發言同科技局有乜嘢關係，大輝回應話，「我嘅發言需要智慧同耐性去聽，你有智慧，畀少少耐性去聽就知有關」。大輝隨後表示，家有唔少政策局表現欠佳，再設一個新局只會拖累政府。