電車轉乘 銅鑼灣站派免費飛

【明報專訊】佔領行動持續超過一個月，當中電車路線因銅鑼灣佔領區而被分開兩截，市民如果由港島東或者港島西去另一邊，要畀兩程車費。為咗減低對乘客影響，電車公司諗出妙計，今日起推出免費電車轉乘，乘客坐電車到佔領區後，如要繼續行程，電車公司會送張免費飛。


例如去港島西嘅乘客，到達維園站後，就可以向在場職員拎張免費西行車飛，步行穿過長500米嘅佔領區後，繼續前往跑馬地至堅尼地城總站沿途各站；往港島東嘅乘客則可以喺銅鑼灣富明街站，拎一張免費東行車飛，同樣步行穿過佔領區後，繼續前往維園至筲箕灣總站沿途各站，但免費車飛只適用於同日分別往來東、西兩區嘅電車路線。