「雨傘馬拉松」開跑

【明報專訊】兩名居港澳洲馬拉松跑手John Ellis、Andrew Dawson，今發起102公里「傘形馬拉松」（Umbrella Ultra Marathon），今朝4點由城門郊野公園出發，途經元朗、大埔、西貢、沙田、旺角、金鐘同薄扶林，預計今晚7點以金鐘佔領區為終點，整條路線將會喺香港地圖上形成一把超巨型雨傘。


今晚7點跑返金鐘

介紹活動嘅網上專頁呼籲市民以黃衣為記，齊齊長跑撐雨傘運動。至於要返工、返學嘅跑手，亦都可以喺今日下晝4點45分，喺旺角亞皆老街同彌敦道交界佔領區集合，加入馬拉松隊伍。


除咗雨傘馬拉松，已為人母嘅前廣告創作人Billie Ng，製作1分多鐘短片《香港的未來》記錄佔領點滴，短片噚日喺網上廣傳。佢搵咗好多小朋友錄VO（旁白），最後寄語香港父母「佔領現在，救救未來」，希望佢哋為咗小朋友嘅將來，企出嚟爭取民主。