樓上店撐佔領：生意好咗

【明報專訊】佔領行動持續咗一個月，旺角佔領區被警方形容為「暴亂邊緣」，亦有唔少人覺得佔領旺角嚴重影響民生，令附近小商舖生意大受打擊。不過，Emily噚日見到喺旺角開樓上手機店嘅鄧老闆，佢話過去一個月嘅生意額唔止無受影響，仲比上年同期升25%，只係附近無車入嚟，上落貨要兜路。佢話諗緊自製印上撐佔領標語嘅手機保護殼，支持學生咁話。


話上落貨兜路「複雜啲」

鄧老闆喺西洋菜南街一座商業大廈開舖5年，主要賣手機同平板電腦嘅周邊產品，過去一個月，因為開學，唔少學生都有買平板電腦，所以生意額日均有5000元，比上年同期嘅4000元大增，而且客人主要網上落訂，再去舖頭攞貨，生意無受影響，佢仲曾經罷市一日落旺角佔領區聲援。


專賣波衫嘅許老闆話，過去一個月雖然有熟客來電話遲啲至嚟攞貨，但生意無升無跌，只係出入貨要兜路可能「複雜啲」，佢話唔明點解旺角「被人講到好危險」。