被指無執法 警澄清睇唔到擲「屎彈」

【明報專訊】前晚喺旺角佔領區彌敦道644號陶德大廈，有人喺高處擲下4袋疑似糞便同油漆嘅混合物，濺中十幾名途人。人民力量義工周先生話，人力咁啱喺嗰個位置擺街站，見到有小朋友中招，周先生即時衝咗上去大廈後樓梯，希望沿途截擊兇徒。當佢走到天台，發現有3名警員面向奶路臣街方向站崗，而距離警員大約3米嘅簷篷，有一個已經爆開咗嘅「屎彈」。


人力義工圖截疑兇 天台見3警

周生先問咗句可唔可以抄低警員編號，負責嘅沙展答﹕「係咪我話介意，你就唔寫低先。」周先生覺得呢個答案有「對抗性」；佢再問警員幾時開始當值、見唔見到高空擲物嘅經過，沙展就話喺黃昏起已站崗，但係乜都聽唔到、見唔到。周先生覺得「屎彈喺佢哋幾米外爆開，佢哋無理由聽唔到」，佢最後向到場調查嘅警員留低咗聯絡資料，警員話會再打番畀佢了解詳情。周先生又引述有在場警員話，兇徒有可能喺陶德大廈隔籬嘅皇上皇新廈擲彈。


警：有2.5米高牆分隔

不過，警方澄清，絕不存在警方無執法嘅問題，仲話懷疑警方縱容罪案發生係十分嚴重嘅指控。警方解釋，當時嗰3名警員喺陶德大廈天台高空監察南面彌敦道與奶路臣街嘅人流，但同皇上皇新廈天台之間有一幅約2.5米高嘅牆分隔，所以就睇唔到事發經過。