無綫台慶日港視擬開台

【明報專訊】港視下個月中開台，一直未公布日期，點知港視喺facebook教人下載佢個App，順手披露咗個App喺下個月19日推出，咪即係喺無綫台慶開台？咁就真係擇日不如撞日，後來港視已經blur咗個日子，但係網民圖已cap，即係港視曲線公布咗開台日，而到時播邊套戲先，就由網民決定。


App已可下載 下周開始投票

港視下星期一開始畀網民投票，揀吓首先播邊套，當中除咗有之前已經播咗第一集嘅《警戒線》，仲有應景講特首選舉嘅《選戰》。


Emily聽聞，港視畀網民票決嘅劇有16套，最多人揀嘅會先播，由於港視家陣唔係正式免費電視台，所以唔會三線劇齊播，只係逐套播，到底最終播邊套，要睇吓網民嘅口味，詳情要留意港視個網。


港視網台仲有唔夠一個月就開，佢哋近日喺facebook教人點樣可以睇到港視，除咗電腦同手機，智能電視同小米盒子都可以下載港視個App，免費睇港視。