足球賽贏明星隊 高永文入波

【明報專訊】食物及衛生局長高永文正推動大腸癌篩檢先導計劃，佢噚日就應香港男士健康學會邀請參加一場足球友誼賽，搵嚟「Big4」組合（許志安、梁漢文、蘇永康、張衛健）同埋作曲人雷頌德對壘，藉此宣揚關注大腸癌健康信息。


高醫生開場前話自己30年無踢波，仲特登著咗對舊波鞋迎戰，點知「甩鞋底」要臨時換鞋，不過小插曲無礙醫生隊贏波，以9比6擊敗明星隊，換咗新鞋嘅高醫生都有貢獻，抽入咗一球！

香港男士健康學會召集人、泌尿科專科醫生傅錦峯話，多做運動可以預防大腸癌，唔少男士都鍾意踢波，希望佢哋早啲保持運動習慣，唔好等到60、70歲先開始。