肥馬獲頒博士 致辭翻長毛舊帳

【明報專訊】商務及經濟發展局前局長馬時亨（肥馬）噚日獲嶺南大學頒發榮譽社會科學博士學位，心情應該好靚，但佢致謝辭時就向社民連主席「長毛」梁國雄翻舊帳，批評長毛早年喺立法會內嘅行為，令佢覺得唔受尊重，「唔尊重他人、唔尊重立法會、唔尊重佢自己，更唔尊重選民對議員履行職責嘅期望」。


肥馬話，大學教育令學生學識尊重，對學生個人同社會都好重要，因為人與人之間無咗尊重，就會無咗互信，「社會就會被非理性嘅對抗撕裂」。佢又話，自己做財經事務及庫務局長時，喺一次立法會審議銷售稅會議上，被長毛高舉輓聯詛咒，批評長毛唔識尊重。


長毛：容不下抗議聲 唔好做官

肥馬話近年多名以民主衛士自居嘅議員，對唔同政見人士掟蕉、掟鞋、飛杯等，又高叫粗鄙、侮辱性言詞，嚴重破壞社會綱紀，「違反真正嘅民主理念」。


Emily之後就同長毛講番肥馬對佢嘅批評，長毛話同肥馬私人上無過節，當時嘅批評、諷刺係針對銷售稅，「銷售稅係苛政，咁都推得出嚟，佢又有無尊重過香港人？」認為若連議員抗議嘅聲音都容不下，就唔好做官喇。