「新男神」話答謝擔遮

【明報專訊】近日網上瘋傳一名警員借水畀示威者飲嘅片段，片中阿sir因為脾氣好、又幽默，迅即爆紅，獲封新一代「男神」。前日有個名叫Ivan Yam、相信就係事件中嘅「警察男神」，喺facebook分享心路歷程，佢話佔中頭幾日，見到條街被人霸咗，其實都好氣憤、好沮喪，而且乜嘢都無做就畀人衝擊同辱罵，「人都癲」，但放工落去彌敦道「諗吓究竟咩料」，經過數日接觸，先調校番個心態。


放工去彌敦道探究 調整心態

任sir又喺fb呼籲示威者唔好衝動，衝擊時知進退，見到警察舉紅旗（警告唔好衝擊）時就好退啦，以免受傷。佢仲話，畀水示威者飲，其實係學師兄弟㗎，亦係感謝番上次有個學生哥幫佢用雨傘遮雨；佢冇諗過條片咁多人like，但亦由此可見示威者同警察之間嘅對立與偏見。


任sir籲勿仇恨 知進退

喺fb上post過「支持香港警察」藍絲帶圖像嘅Ivan哥，亦留言話「希望大家理解警察都係人，都會有情緒，每個人忍耐力都會有限度」，又提醒「對立，會引起仇恨；仇恨，會令人瘋狂」，嗌交要兩個人先得，「你如果EQ夠，不如先做理性嗰個」。