鼠戰中環健兒 話空氣好咗

【明報專訊】因為佔領行動，有大型活動避開中環舉行，但一年一度嘅「鼠戰中環」活動就如常舉行。呢項慈善活動，參加者都別出心裁打扮，小丸子、多啦A夢、龍珠同蝙蝠俠都嚟湊湊熱鬧，佔領區就喺咫尺之外，但Emily就見唔到有人著上同雨傘運動有關嘅裝扮，睇嚟各參加者都好貼合主題。


今次「鼠戰中環」係第9年舉辦，為推動精神健康嘅「思健」籌款。噚日逾500個參賽者繼續扮鬼扮馬，分成多隊喺中環繞圈跑接力賽，同埋玩各種小遊戲，鬥智鬥力。主辦單位話賽道同去年一樣，冇因為佔中而改道，有份主持開幕禮嘅置地行政總裁彭耀佳仲特登喺致辭中答謝警察幫手。


戴德梁行亦挑戰

52隊參加接力賽嘅團體多數來自大企業，當中包括近日新聞多多嘅戴德梁行，8個參賽成員著上感恩節火雞嘅裝扮，第10名衝線。敏感話題大家都唔講太多，不過其中一個上年有參賽嘅成員就同Emily講，今年空氣比上年清新，跑得好舒服咁話。


至於今次活動，至尊鼠王盃（最快完成「鼠王爭霸戰」嘅高級行政人員）由世邦魏理仕有限公司施懷德奪得，而未來鼠王盃（最快完成「未來鼠王戰」嘅參賽者）由曹思捷奪得。