鬼馬老友賀沈祖堯牛一

【明報專訊】佔中事件爆發後，中文大學校長沈祖堯好擔心參加佔中集會嘅學生人身安全，有晚清場風聲吹得好勁，沈祖堯搵埋港大校長馬斐森，兩個人汗流浹背到金鐘勸學生馬上撤離。一班老友見佢呢排憂心忡忡，頻頻撲撲，咁啱下周三（22日）係佢「牛一」，老友靜靜雞喺今個禮拜二晚訂咗一圍酒，呃佢話老友食餐飯，佢去到大家唱生日歌，祝佢生日快樂，佢先知係surprise party ，好開心。


同佢慶生嘅老友，有醫管局前主席胡定旭、前衛生署長林秉恩、醫管局行政總裁梁栢賢、港大醫學院院長梁卓偉，同埋佢嘅愛將、中大醫學院院長陳家亮等，大家送咗個生日蛋糕畀佢。


安排酒席提前慶生

席上，有人「爆」陳家亮同沈祖堯喺同月同日生日，大伙兒起哄為陳家亮慶祝生日，但係究竟兩人家幾多歲，知情者話係「秘密」，Emily祝沈陳兩位醫學界猛人生日大快樂！