新聞類別
財經
詳情#
【明報專訊】天津津燃（1265）前董事長金建平涉貪污公款3600幾萬，受賄400幾萬元單案，據大陸傳媒引率辦案人員形容，金建平係「過日子型貪官」，意思係佢嘅贓款係用來過日子，唔係嘥咗。即係點？聽講，佢全部贓款都用嚟買樓同埋投資，政府唔單止全部追番，仲有升值"口添"。
報道又話，金建平逃亡嘅日子，據聞佢扮成老菜販，做足全套功夫：頭戴頂爛帽，腳踩三輪車，三輪車入面就擺咗150萬元人仔現金。
其實自從人稱習大大嘅習主席上台之後，幾乎每一兩日就傳出有新嘅貪官落網。因為實在太多，開始要分類，除咗有「過日子型貪官」，第日可以再做出更加細緻嘅區分，譬如包養情婦如果係出於真感情，就可以稱之為「浪漫型貪官」，為子女撈資本顯然就係「拚爹型貪官」。今時今日，真正清廉嘅官並不多，對於貪官大家心態亦都要開放。
金建平講起自己初起貪念，係因為朋友圈非富即貴，私營老闆揮金如土，國企高管收入奇高，心理落差太大。事實上，內地做官人工好低，我哋香港高薪都未必可以養廉，喺內地做清官，對人嘅定力要求實在係非常之高。
email: piano@mingpao.com
[小琴密語]
留言 (0)
