天氣先生小姐 化妝寫稿剪片一腳踢

【明報專訊】唔少人出門口前都睇睇天氣報告，去年尾天文台開始自己製作高清天氣節目《天氣廣播站》，除咗有天氣預報，逢周五黃昏仲有「氣象冷知識」，介紹氣象有趣之處。原來節目不但由天文台科學主任做主持，背後連化妝、寫稿、設計圖像、錄影甚至剪輯片段同傳送到各電視台，都係呢班科學主任一手包辦。


政府新聞網噚日介紹科學主任工作，其中科學主任李鳳瑩話，出鏡技巧在於「要幻想熟悉嘅人喺攝影機後，要同攝影機發生感情」，同時肩負天氣預測和發布警告信號嘅李鳳瑩話，好開心搵到一份有使命感嘅工作。


氣象冷知識 分享香港美麗一面

做咗科學主任19年嘅楊漢賢話，其中一集氣象冷知識係去大帽山頂拍攝雲海，佢話「呢條片出街後，好多人話原來香港咁靚」，佢希望透過呢類節目令大家對天氣認識更多，又可以將香港美麗嘅一面同大家分享。