建制派視民主思路同路人？ 黃梓謙：「黃色指數」肯定唔係零

【明報專訊】立法會選舉將近，唔少有政治立場嘅facebook專頁都開始為選舉造勢。「一人一簽名支持反佔中」專頁就圖文並茂港島候選人名單，仲為各候選人嘅「黃色指數」同「（港）獨素」評分，講明「不要港獨黃屍，踢走黑金政棍」。喺呢個專頁，民主派嘅民主思路黃梓謙就「被建制」。


反佔中專頁將黃梓謙嘅嘜頭排喺建制派候選人之間，佢畀工聯會郭偉強同無黨派嘅前議員詹培忠夾實；專頁仲喺黃梓謙嘅「黃色指數」同「獨素」兩項評分打問號。黃梓謙笑住話，時不時都會發生呢啲情况，唔同黨派嘅專頁都會將佢放喺唔同嘅歸類，佢強調自己係實幹民主派，「黃色指數」肯定唔係零，但表明係反對港獨。


反佔中專頁雖然對各候選人嘅「黃色指數」同「獨素」評分，不過，就無列出評分標準，所以評分係咪正確，就要由讀者自行判斷。


港島區其他候選人名單包括：劉嘉鴻、葉劉淑儀、何秀蘭、張國鈞、鄭錦滿、羅冠聰、沈志超、王維基、徐子見、司馬文、許智峯、陳淑莊。