麥玲玲批CY要「退後啲」

【明報專訊】佔領行動持續，旺角就出現號稱「最強路障」嘅關帝祭壇，有心人將已開光嘅關帝像放喺旺角道，連土地公也請埋嚟。堪輿學家麥玲玲噚日到場觀察關帝祭壇嘅擺位，佢話從玄學角度嚟睇，關帝像嘅擺位同方向都無問題，仲話關帝祭壇可化解部分怨氣，同時提升群眾精神咁講。


話關帝祭壇可解怨氣

麥玲玲又話，特首梁振英嘅命格，同今年天干地支完全相冲，屬60年一遇嘅大衝擊。咁大件事，應該點化解呢？佢話，無論CY點處理，都只會搞得更差，反而退後啲、畀其他人接手會仲好咁話。咁樣，唔通寓意CY應該落台？有網民就話玲玲馬後炮，不過睇番舊報紙，原來佢兩年前已經提過，CY面相太單薄，做特首都辛苦過人，社會亦都多問題，仲叫大家考慮移民瓦努阿圖喎。


佔旺期間，平時車來車往嘅彌敦道變成遊樂場，噚晚有人拉出乒乓波枱，直接喺街頭玩「全民運動」，但有份「開波」嘅佔領人士就有啲嘆息，話「都唔知點解香港變成咁」；亦有小朋友喺馬路「跳飛機」，不過地下就鋪咗多張梁振英同建制派人士嘅肖像，似乎係想畀佔領者發泄。