冀收復委員會失地 建制派各出「奇由」

【明報專訊】泛民主派早前「突襲」成功，立法會財委會轄下嘅工務同人事編制委員會幾乎被全體泛民議員「佔領」，人數多過建制派。點算？即使人事編制小組委員會嘅入會限期已過，18個建制派議員為咗收復失地，都急急腳以各種奇趣嘅理由要求加入委員會，包括「助理出錯」、「忙於處理近日業界面對塞車問題」等。不過，最有霸氣嘅理由，莫過於民建聯蔣麗芸（Ann姐）提出嘅「反對派議員背信棄義」，所以佢申請入會！


民建聯7議員稱助理出錯

Emily發現民建聯7個立法會議員都係清一色以「助理出錯」或「助理一時大意」為由，要求加入委員會，令到「助理出錯」成為最受歡迎原因，唯獨Ann姐好有霸氣唔跟大隊，擺明車馬向泛民「挑機」。自由黨嘅航運交通界議員易志明就話，因為近日忙於處理業界嘅塞車問題，所以唔記得報名！如果易志明可以成功加入委員會，咁佔中都算為建制派議員做咗件好事吖。


無黨派謝偉俊個理由就好理性，表明因為近日社會秩序遭受嚴重破壞，議會有效運作更為重要，所以經再三考慮後，希望加入人事編制小組。