網民列好男人新條件

【明報專訊】抗爭都要扮靚靚

佔中啟動咗10日，唔少市民就留守足咁多日，街頭已經成為有啲人嘅「家」。噚日網上廣傳一張添美道女廁內圖片，洗手盆同鏡都乾淨到「擸擸令」，女士自發分享唔同嘅潔面、護膚、冲涼同洗頭用品，連保濕面膜都搵得到。另外有網民分享佔中後嘅「新好男人」條件，話男人「可以不住半山，但要守護過旺角」，引起好多女網友共鳴喎！


香港人一向獲讚適應力強過小強（蟑螂），Emily發現市民留守各區多日之後，都漸漸悟出「瞓街」真諦，金鐘區有酒店級衛生、家庭式齊全嘅公廁，有女士貼出溫馨告示，叫大家留守都不忘keep住靚樣。


低頭族扶人跨壆

另外，就係平時成日被責難坐港鐵唔肯讓座嘅低頭族少年，家三三兩兩駐守金鐘海富同政總之間夏愨道路壆，扶助過路嘅人安全跨越，希望佢哋keep住呢種美德啦。


最好揸貨車 隨時幫手

但最令Emily估唔到嘅，就係佔中改變咗女士擇偶條件！女網友「張文」喺網上開出新「筍盤」指標，留言短短一日獲得超過2000個讚好。佢心目中嘅好男人唔需要住半山，高學歷、大隻統統唔需要，相反應該要守護過旺角，兼且有勇有謀、夠man夠豪氣兼有高EQ，最好仲要係揸貨車，因為有咩事就可以載兄弟出去幫手咁話。唔知各位佔領男士又符唔符合呢啲新條件？